Actos relixiosos
Vive a Devoción e a Emoción de A Barca! A tradición non só é a orixe, senón a alma desta festa, invitándote a conectar con séculos de historia e fe nun entorno inigualable.
A esencia das nosas festas comeza moito antes da fin de semana grande, coa Novena a Virxe da Barca. Dende o xoves da semana anterior ata o venres da Romaría, o santuario énchese de oracións que invocan á Santa. Cada día é unha oportunidade para revivir a fascinante lenda da aparición da Virxe ao Apóstolo Santiago e coñecer os milagres que se lle atribúen. Este recollemento enriquecese coa presencia de distintos párrocos que presiden e predican cada tarde. E como broche de ouro, a Novena culmina co emotivo canto do himno de A Barca, unha peza que o poeta muxián Gonzalo López Abente dedicou a nosa venerada Virxe.
O ano 2024 marcou un fito con importantes novidades que uniron a fe coa tecnoloxía. A retransmisión das misas por streaming permitiu que a devoción chegara a cada recuncho do mundo. Ademais, estreamos un novo altar, un ambón moderno e unha réplica da Virxe da Barca creada con tecnoloxía 3D, bendicidos polo Arcebispo de Santiago de Compostela nun solemne acto. Tamén recuperamos a emocionante Procesión nocturna dos fachos o sábado anterior á fin de semana grande. Centos de persoas acompañaron á imaxe da Virxe no seu percorrido iluminado, unha experiencia máxica que conectou o santuario co corazón de Muxía.
Despois da Novena, chega o clímax da celebración. As misas solemnes do sábado, domingo e luns seguen a tradición descrita xa en 1864, enchendo o aire de fervor. A Coral Polifónica de Muxía, nada para honrar estes actos, é a voz da Misa solemne do Domingo da Barca, agora coñecida como Misa Campestre e celebrada ao aire libre para acoller a miles de fieis.
As procesións do domingo e do luns son momentos cume. O domingo, a imaxe da Santa trasládase nun acto multitudinario ata a igrexa parroquial, facendo unha parada especial no porto para a bendición dos fieis. A Virxe permanece na igrexa ata o luns, un día especialmente dedicado aos residentes do municipio, cando é trasladada de novo en procesión ao seu Santuario. Rodeando o Santuario, atoparás os tradicionais postos de rosquillas, churros e artigos relixiosos como exvotos e velas, que se manteñen dende o inicio da Novena ata o luns de peche.
